伍濤月訊 - 2022年2月

究竟2022 · 0222 · 20:22 發生咩事？之唔係伍濤年度籌款《藝力・易行》嘅網上直播分享會囉！感謝各位義工同行者嘅參與，第一次直播竟然都有將近40位參加者，而且跟足全程75分鐘絕無冷場，簡直遠超同工們預期！ 
 
「心靈健康，先係抗疫嘅良藥——無論疫情or逆境！」
 
2022年《藝力・易行》年度籌款項目，承接去年《藝力・踐行》，2月22日，全力啟航！面對疫情定逆境，人係好需要「抒發」吓情緒、「紓解」吓生活中嘅煩憂。伍濤以簡單易成功嘅藝術，幫助人輕鬆表達內心情感，營造「好心情」、「好信念」。簡單嘅藝術活動，容易令人滿足，令人有力量，甚至帶嚟生活嘅新想望，唔再覺得自己係「災民」。


 
過去因著你哋嘅支持，令我哋服務超過650位兒童、150個家庭，超額培訓16位藝術導師。今年我哋好希望繼續以藝術建立「好心情社區」。但真係好需要你成為「藝力・易行」嘅一份子：一齊嚟燃點希望，換好心情，賺取更多生命。

立刻行動，又出力推動，又大力支持！
請即登入 https://www.wave5.com.hk/artpower2022/

同工的成長突破
今年每個同工都有唔同嘅新目標同突破，以家俊為例，舊年佢打破紀錄，每個周一早上為同工們舉行一節音樂盛宴，帶領同工做團隊對齊；乘住去年嘅成功，今年佢又有新突破，決定每月與同工分享一個繪本故事，立志做一個說書人！第一次分享，就贏盡所有同工嘅掌聲！下次有機會，小編會偷偷在場直播，若你都想目睹家俊講故事嘅風采，千祈咪錯過我哋嘅FB同IG更新！
 
除此之外，Rainbow亦新鮮完成兩本手繪繪本嘅所有插畫工作👏🏻👏🏻👏🏻！預期在不久將來，兩本新書排版後，就可以面世！好期待呀！

藝術體驗
Rainbow在疫情最爆的日子前，剛好趕上辦一次親子和粉體驗活動。好多家長都好享受呢次活動，有啲同孩子畫得9分似，有啲又同孩子果幅互相配搭。大家都將每位家庭成員畫成一粒「桔仔」，結果張張都大桔細桔，桔來桔去，大吉大利，好精彩呀！
 
Patsy都不甘示弱，雖然疫情來襲，但仍然從容地與伙伴一起完成一次網上《愛自己擁抱情緒幼兒藝術小組》，參加嘅一班幼兒個個都好可愛，好投入！透過小手工同故事，學習情緒管理，祝福佢哋成長過程都可以同自己嘅情緒做好朋友！

繼續承先啟後
一月底，一班同工們受邀出席核心義工小王老師嘅榮休禮，我哋在此深深感謝小王老師過去13年，帶領伍濤同工們一齊走出去、唱出去、跳出去。小王老師嘅熱情、音樂同笑聲，我地一定會繼續承接，傳到更遠嘅地方！多謝小王老師成日請同工食飯，又常常成為同工心靈上嘅支援，有你真係太好喇！小編代所有同工義工們，祝福你，下一里路更豐盛！
 
為感謝前總幹事淑娟老師過去13年的堅持與委身，以及祝福新總幹事彪老師接任，原定2月份舉行的《濤寶薪火相傳薈》，現因疫情而押後。有關安排，請留意伍濤最新公佈。
 
薪火相傳，並不受疫情甚或任何外在環境阻擋。由2022年1月1日起，淑娟老師已從原崗位卸任，由彪老師正式接任伍濤基金會總幹事一職。彪老師定必承傳使命，以藝力踐行，發揮創意，帶領伍濤團隊和義工們，一齊走入社區，用藝術、音樂、繪本故事，祝福在困境中嘅孩子同家庭。

Bank Name: The Hongkong and Shanghai Banking Corporation Limited
Address of HSBC Office: 1 Queen's Road Central, Hong Kong. 
SWIFT code: HSBCHKHHHKH
Account Name: Wave5 Foundation Ltd.
Account Number: 015-662513-838